Black Hat Asia 2025 konferensiýasynda PCAutomotive kompaniýasynyň hünärmenleri 2020-nji ýylyň Nissan Leaf elektrik ulagynda howply gowşaklygyň bardygyny habar berdiler. Mesele multimediýa ulgamynyň Bluetooth moduly bilen baglanyşykly diýip, SPEEDME neşiri ýazýar.
Hünärmenler internet arkaly ulagyň funksiýalaryny uzakdan dolandyrmagyň mümkindigini görkezdiler. Olar aýna süpürgiçleri, penjireleri, mikrofony, GPS-y, şeýle hem awtoulagyň yşarat berijisini dolandyrmagy başardylar.
Iň howply ýeri, awtoulag hereketdekä ruly öwrüp bilmekdir. Görkeziş wagtynda topar awtoulagyň ugruny içinden däl-de, uzakdan dolandyrýardy. Emma tormoz we gaz ulgamlarynyň işine gapdaldan gatyşmak başartmady.
Gowşaklyk 2023-nji ýylda ýüze çykarylypdy, şonda maglumatlar öndürijä gowşurylypdy. Nissan-yň wekilleri hasabaty alandyklaryny tassykladylar, ýöne howpuň düzedilendigini-düzedilmändigini ýa-da zerur täzelenmäniň çykarylandygyny-çykarylmandygyny takyk aýtmadylar.
