Apple kompaniýasy iPhone 18 hataryny giňeltmegi göz öňünde tutýar. Adaty we flagman wersiýalardan başga-da, oňa Air, “e” modelleri, şeýle-de kompaniýanyň ilkinji eplenýän smartfony girer. Smartfonlaryň premýerasy birnäçe tapgyrda geçer.
The Information-dan insaýder Ueýn Manyň maglumatlaryna görä, 2026-njy ýyldan başlap Apple smartfonlary çykarmak strategiýasyny üýtgeder. Güýzde täze dizaýn bilen iPhone 18 Pro we Pro Max modelleri görkeziler. Smartfonlar inçe çarçuwalara eýe bolar. Selfi kamerasy çep burçda, Face ID sensory bolsa ekranyň astynda ýerleşer. Bu “arassa” displeýi döretmäge tarap ädim bolar. Şeýle-de, iPhone 18 Pro-da dürli ýagtylyk şertlerine görä sazlanyp biljek diafragmaly kamera peýda bolar.
2026-njy ýylyň güýzünde örän inçe iPhone 18 Air görkeziler – bu 2025-nji ýylda görkeziljek täze smartfon wersiýasynyň ikinji neslidir. Çaklamalara görä, iPhone 17 Air smartfony hataryň satuwynyň, takmynan, 10%-ini üpjün eder we täzelenme islege itergi berer.
Şeýle-de, 2026-njy ýylda Apple ilkinji gezek eplenýän smartfonyny hödürlär. Açylan görnüşde onuň ýogynlygy 4,5 mm bolar. Gajet Touch ID düwmesi, iki kamera, titan korpus we EA funksiýalary bilen üpjün ediler. Daşarky ekran 5,5 dýuým, içerki – 7,8 dýuým bolar. Bahasy – 2000 dollar töweregi.
Adaty iPhone 18 we onuň ýönekeýleşdirilen görnüşi iPhone 18e 2027-nji ýylyň birinji ýarymynda peýda bolar. Ueýn Manyň pikiriçe, şeýle çemeleşme has elýeterli modelleriň kömegi bilen smartfon hataryna ünsi çeker.
