Samsung kompaniýasy täze Galaxy S25 Edge smartfonynyň tanyşdyrylyş senesini yglan etdi. Model Galaxy S25 hatarynyň üstüni ýetirer we resmi taýdan 13-nji maýda hödürlener.
Öň internet torunda smartfonyň suratlary, şeýle-de onuň käbir aýratynlyklary barada maglumatlar peýda bolupdy. Bu korpusynyň ýogynlygy 5,85 mm bolan örän inçe smartfondyr. Syzma maglumatlara garamazdan, täze smartfon heniz giň köpçülige görkezilmedi.
Samsung KHBS üçin çakylygynda Galaxy S25 Edge-i ýönekeý bir inçe smartfon däl-de, S seriýasynyň flagman adyny tassyklaýan, oýlanyşykly dizaýna we ösen tehnologiýalara eýe bolan gurluş diýip atlandyrýar.
Modeliň esasy aýratynlygy 200 Mp sensorly giňburçly kamera bolar. Şeýle-de, smartfonda emeli aň funksiýalarynyň goldawy göz öňünde tutuldy.
Galaxy S25 Edge 1440p durulykda 6,7 dýuýmlyk displeýe eýe bolar. Öndürijilige 12 GB operatiw ýat bilen bilelikde Qualcomm Snapdragon 8 Elite prosessory jogap berer. Gurluş 256 ýa-da 512 GB saklaýjy bilen elýeterli bolar.
Korpusyň inçeligi sebäpli akkumulýatoryň sygymy seriýanyň beýleki modellerinden az bolar. Deslapky maglumatlara görä, Galaxy S25 Edge 3900 mA/sag batareýasy bilen enjamlaşdyrylar, bu bolsa Galaxy S25+-dan 1000 mA/sag azdyr. Şol bir wagtyň özünde, smartfon ýeňil bolar – onuň agramy 163 gramdan geçmez.
