Sankt-Peterburgda iki sany täze gökdirän binanyň gurluşygyna taýýarlyk işleri dowam edýär. “Gazprom” JPJ olary Ýewropanyň iň beýik binasy (462 m) bolan “Lahta Merkeziniň” gapdalynda gurmagy meýilleşdirýär. Täze binalaryň beýikligi 555 we 703 metr bolar.
Taslama durmuşa geçirilen ýagdaýynda 703 metrlik gökdirän bina dünýä sanawynda Dubaýyň “Burj-Halifasyndan” (828 m) soňra ikinji orny eýeläp biler. Häzirki wagtda beýikligi boýunça ikinji orunda durýan bina Malaýziýanyň Merdeka 118-i (679 m), üçünji orundaky beýik bina bolsa Şanhaý diňidir (632 m).
Emma beýikligi boýunça ikinji derejeli status diňe iki şert bilen mümkindir. Birinjisi, eger Saud Arabystanyndaky 2025-nji ýylda gurluşygy gaýtadan bat alan Jeddah Tower-iň gurluşygy tamamlanmasa (beýikligi, aýdyşlaryna görä, 1 kilometrden geçmeli). Ikinjisi, BAE-däki “Burj-Azizi” gurlup gutarylmasa (beýikligi 725 m bolmaly).
2025-nji ýylyň maý aýynda Sankt-Peterburgyň şähergurluşyk komiteti “Sinergiýa” paýdarlar jemgyýetiniň Primorskiý etrabynda “Lahta Merkezi-2” we “Lahta merkezi-3” gökdirän binalaryny gurmak üçin taslama resminamalaryny taýýarlamak baradaky arzasyny tassyklady. Bu işler üstümizdäki ýylyň ahyryna çenli tamamlanar, gurluşygyň özi bolsa 2031-nji ýyla çenli tamamlanar.
Döwlet gurluşyk gözegçilik gullugy ozal üç binanyň ýykylmagyny we täze desgalar üçin dört gatly energiýa merkeziniň gurulmagyny tassyklapdy.
Bilermenler bu taslamanyň şäheriň keşbine täsir etjekdigini bellediler. Sankt-Peterburgyň taryhy bölegi, adatça, 7-9 gatly belent binalar bilen häsiýetlendirilýär. Hususan-da, Russiýa Federasiýasynyň at gazanan gurluşykçysy Roman Miroşnikow, esasan, “Lahta Merkeziniň” bolmagy şäheriň panoramasyna eýýäm üýtgeşmeleri girizýändigini we ýene iki desganyň peýda bolmagynyň eýýäm döredilen şäher landşaftyna düýpli täsir edip bilmejekdigini aýtdy. Şeýle-de bolsa, bilermenler infrastruktura aýratyn üns berilmelidigini, sebäbi oňa düşýän agramyň gürrüňsiz artjakdygyny bellediler.
