Xiaomi, BBK Group (Oppo, Vivo we OnePlus brendleriniň eýesi) we Huawei bilelikde Google Play hyzmatlary bolmazdan hem işläp biljek HyperOS 3 operasion ulgamyny işläp düzýärler. Bu ädim ABŞ-nyň täze sanksiýalarynyň mümkinçiligi bilen baglanyşykly bolup, şol sanksiýalar eýýäm Huawei kompaniýasyna güýçli täsir etdi. Bu barada Xiaomi-niň ösüşlerine gözegçilik edýän «XiaomiTime» maglumat berýär.
Çeşmelere görä, HyperOS 3 Huawei-niň HarmonyOS ulgamyna meňzeş bolar we ABŞ tarapyndan Android-den peýdalanmak mümkinçiligi çäklendirilse, ulanmaga taýýar bolar.
Häzirki wagtda Xiaomi kompaniýasy Google hyzmatlary bilen bilelikde Android ulgamyny ulanmagyny dowam etdirýär, ýöne ABŞ-nyň administrasiýasy bilen gatnaşyklaryň näbelliligi sebäpli, kompaniýa iň ýaramaz ssenariý taýýarlanýar. Bu ýagdaý şu aýyň dowamynda işe girizilmegine garaşylýan Xiaomi-niň 3-nanometrli özbaşdak çip ulgamyny işläp düzmeginiň üstünlik gazanmagy bilen hem has çylşyrymlaşýar. Bu ýagdaý amerikan häkimiýetleriniň ünsüni has-da köp çekip biler.
Google hyzmatlary bolmazdan işlemäge ukyply tejribesi bolan Huawei bilen BBK Group-yň hyzmatdaşlygynyň maksady durnukly ekoulgam döretmekdir. Emma Android ulgamyndan ýüz öwürmek satuw bazaryny diňe Hytaý bilen çäklendirip biler, sebäbi dünýä derejesinde ulanyljak alternatiw programma dükany döretmek gaty kyn we çylşyrymly mesele. HyperOS 3-e Xiaomi, Oppo, Vivo we OnePlus brendlerini mümkin bolan söwda çäklendirmelerinden goramak üçin strategik ätiýaçlyk hökmünde garalýar.
Häzirki wagtda sanksiýalar güýje girenok, şonuň üçin Hytaýdan daşarda ýaşaýan Xiaomi ulanyjylary henizem Google hyzmatly smartfonlary ulanyp bilýärler. Kompaniýanyň muşdaklary alada galmak gerek däl, şeýle-de bolsa HyperOS 3-iň işlenip taýýarlanmagy Xiaomi-niň potensial howplara çynlakaý çemeleşýändigini görkezýär.
