OpenAI ChatGPT çat-botunyň her bir adamyň özüne laýyk gelýän wersiýasyny saýlamak boýunça gollanma hödürledi. Ol kompaniýanyň resmi saýtynda ýerleşdirildi.
Häzirki günde ulanyjylar üçin dürli modeller elýeterli: GPT-4o, GPT-4.5, o4-mini, o4-mini-high, o3 we o1-pro. Olaryň her biri dürli ýumuşlar üçin laýyk gelýär.
GPT-4o tizligi talap edýän gündelik işler üçin niýetlenendir. Ol dürli formatlary: teksti, şekilleri, jedwelleri, audiony we wideony goldap, hat ýazmak, resminamalary seljermek we meýilnama düzmek üçin laýyk gelýär.
GPT-4.5 döredijilik işleri üçin maslahat berilýär. Ol konteksti göz öňünde tutýar we marketing tekstlerini ýa-da sosial ulgamlarda postlary ýazmak üçin ulanylyp bilner. Ýöne bu wersiýada çäk bar – hepdede 20 sorag. GPT-4o-da ondan tapawutlylykda çäk ýok we ol has hemmetaraplaýyn.
Tehniki işler üçin o4-mini-niň iki wersiýasy elýeterli. Esasy model soraglara çalt jogap berýär we günde 300-e çenli soraga rugsat berýär. o4-mini-high wersiýasy has giňişleýin jogap berýär, ýöne günde 100 sorag bilen çäklenýär.
o3 modeli – iň güýçlüsi. Ol strategik meýilnamalaşdyryş, has uly göwrümli maglumatlary işlemek ýa-da çuňňur seljerme ýaly köp tapgyrlaýyn işler üçin laýyk gelýär. Onuň çägi – hepdede 100 sorag.
Şeýle-de, o1-pro elýeterli. Bu uzak möhletli seljeriş işi üçin niýetlenen köne modeldir.
