Amerikaly aýdymçy Ledi Gaganyň 3-nji maýda Braziliýanyň Rio-de-Žaneýro şäherindäki Kopakabana kenaryndaky mugt konsertine, takmynan, 2,1 million adam gatnaşdy. Bu barada ýerli häkimiýetleriň beren maglumatlaryna salgylanyp, «BBC» habar berýär.
Çäräni şäher häkimligi gurnady.
Bu çykyş aýdymçynyň «Mayhem» atly sekizinji albomynyň tanyşdyryş saparynyň bir bölegi boldy. Gaga käbir sahnalarda Braziliýanyň milli futbol ýygyndysyndan ylham alnyp taýýarlanan, Braziliýa äheňli lybaslarda çykyş etdi. Tomaşaçylar onuň «Alejandro», «Poker Face» hem-de «Abracadabra» ýaly meşhur aýdymlaryny bilelikde biragyzdan aýtdylar.
Ledi Gaga Braziliýada ozal 2012-nji ýylda çykyş edipdi.
Konsertiň howpsuzlygyny üpjün etmek üçin, 5000 polisiýa işgäri çekildi. Tomaşaçylar metal detektorlar bilen barlandy. Şeýle-de dronlar we ýüz tanama tehnologiýasy bilen enjamlaşdyrylan kameralar ulanyldy.
Ledi Gaga Rioda mugt çykyş eden ilkinji artist däl. 2024-nji ýylyň maýynda Madonna hem Kopakabana kenarynda konsert beripdi, oňa 1,6 million adam gatnaşypdy. Şäher häkimiýetleri Gaganyň şowly şüweleňi Rionyň ykdysadyýetine, takmynan, 100 million dollar girdeji getirer diýip garaşýarlar. Häkimiýetler şeýle konsertleri, azyndan, 2028-nji ýyla çenli her ýyl geçirmegi meýilleşdirýärler.
