Gazagystanyň häkimiýetleri “altyn wizany” bermegiň düzgünlerini tassyklady. Ol daşary ýurt maýadarlaryna on ýyla çenli möhlet bilen ýaşaýyş ygtyýarnamasyny almaga mümkinçilik berýär.
Respublikanyň Daşary işler ministrliginiň habar berşi ýaly, wizany resmileşdirmek üçin daşary ýurt maýadarlary Gazagystanyň kompaniýalarynyň başlangyç kapitalyna azyndan 300 müň dollar maýa goýmaly ýa-da ýerli gymmatly kagyzlary satyn almaly.
Edara şeýle wizanyň Gazagystany maýa goýumlar üçin has özüne çekiji etjekdigini hem-de şeýle maksatnamalaryň ABŞ-da, BAE-de, Singapurda we Ýewropa ýurtlarynyň birnäçesinde eýýäm hereket edýändigini belledi.
Gazagystanda maýa goýum wizasyny girizmek pikiri eýýäm birnäçe ýyl bäri gözden geçirilýär. Forbes Kazakhstan-yň bellemegine görä, 2018-nji ýylda daşary ýurtlulara gozgalmaýan emläge ýa-da gymmatly kagyzlara 100 – 200 müň dollar maýa goýan ýagdaýynda ýaşaýyş ygtyýarnamasyny bermek teklip edildi.
Mundan başga-da, 2023-nji ýylyň noýabrynda ýurtda Neo Nomad wizasy işe girizildi. Ol daşary ýurt kompaniýalary üçin uzak aralykdan işleýän syýahatçylara niýetlenýär we Gazagystanda bir ýyla çenli galmaga mümkinçilik berýär.
