Tehas ştatynyň (ABŞ) «Big-Bend» milli seýilgähinde Sul-Ross döwlet uniwersitetiniň (SRSU) talyplary tötänden taryhy tapyndynyň üstünden bardylar: gadymy dünýäniň hakyky titany bolan alamozawra degişli äpet daşlaşan oňurga tapyldy.
Bu açyş mart aýynda ekspedisiýa wagty ýüze çykaryldy. Şonda talyplar mel hem-de eosen döwürlerine degişli geologik gatlaklary öwrenýärdiler. Şol ýerden üýtgeşik bir gaýanyň tapylmagy gadymy taryhyň sahypalarynyň täzeden ýazylmagyna sebäp boldy.
Alamozawr – titanozawrlar maşgalasyna degişli äpet jandar bolup, doly ýetişende onuň uzynlygy 21 metre ýetýärdi, agramy bolsa 30 tonnadan hem agyr bolýardy. Bu ot iýýän ägirt jandar häzirki ABŞ-nyň ýerlerinde, takmynan, 66-70 million ýyl ozal, dinozawrlaryň döwrüniň soňky ýyllarynda ýaşap geçipdir.
«Big-Bend» milli seýilgähiniň gadymy dünýäniň hazynasy hökmündäki abraýy ýene-de bir gezek tassyklandy. Bu ýerden ozal hem äpet şahly dinozawr bolan Bravoceratops polyphemusyň kellesi, şeýle-de ganat gerimi 11 metre barabar bolan pterozawryň galyndylary tapylypdy. Indi bolsa, şol tapyndylaryň üstüne täze bir gadymy güýjüň nyşany goşuldy.
