Niderlandlaryň Apeldorn şäherinde şäher häkimligi ýalňyşlyk bilen 46 sany sungat eserini zyňypdyr diýip, Bi-bi-si habar berýär.
Ýitirilen eserleriň arasynda amerikaly suratkeş Endi Uorholyň 1980-nji ýyllaryň ortalarynda döreden şa zenany Beatriksiň portreti hem bar. Bu eser ýüpek neşir bolup, bahasy azyndan 15 müň ýewro durýar.
Suratlar abatlaýyş işleri geçirilýän döwründe şäher häkimliginiň ammar edilen ýerzeminine geçirilipdi. Jemgyýet geňeşiniň berýän habaryna görä, şondan soň eksponatlar zibil bilen çykarylyp äkidilen bolmaly.
"Gymmat bahaly zatlar beýle saklanmaly däl. Ýöne, gynansak-da, şeýle bolupdyr. Gynanýas"- diýip, Apeldornyň häkimi Hans wan der Pas ökünjini beýan edýär.
Algemeen Dagblad gazeti öz derňewini geçirdi we sungat eserleriniň ýerzemindäki zibil gaplarynda galdyrylan bolmagynyň mümkindigini anyklady.
Ýitirilen zatlaryň umumy bahasy azyndan 22 müň ýewro bolmaly diýip çaklanýar.
Endi Uorhol - amerikaly suratkeş, XX asyryň iň meşhur ussatlaryndan biridir. Ol pop-art stilinde işledi we döwürdeşleriniň ajaýyp portretlerini çekenligi bilen meşhur boldy. Hususan-da, ol Merilin Monro we Elizabet Teýlor ýaly meşhurlary şekillendirdi. Beatriksiň portreti Uorholyň "Hökümdarlyk edýän şa zenanlar" seriýasynyň bir bölegi bolup, oňa Britaniýanyň şa zenany Ýelizaweta II-niň, Daniýanyň şa zenany Margrete II-niň we Eswatininiň şa zenany Ntombi Twalanyň portretleri girýärdi. Jemi 16 eser bardy.
