Asly hytaýly Lýusi Go dünýäniň iň ýaş zenan milliarderleriniň sanawynda Teýlor Swifti yzda galdyrdy. «Forbes-iň» hasaplamasyna görä, Lýusi Gonuň baýlygy 1,25 milliard dollara barabar.
Lýusi Go kollejini taşlap, 21 ýaşynda emeli aň tehnologiýasyny işläp düzýän Scale AI kompaniýasynyň esaslandyryjylarynyň biri boldy. Onuň hyzmatdaşy 19 ýaşly Aleksandr Wandy. Go San-Fransiskoda (ABŞ) ýerleşýän startapda iş amallaryna hem-de önümçilik toparlaryna ýolbaşçylyk etdi. 2018-nji ýylda bu kompaniýanyň iki esaslandyryjysy hem Forbes-iň 30 ýaşdan kiçiler sanawyna (Forbes Under 30) girizildi. Şol ýyl olaryň kompaniýanyň geljegi baradaky garaýyşlary biri-birine laýyk gelmedi we Wan Gony işden boşatdy. Lýusi Scale AI kompaniýasyny terk etdi, ýöne kompaniýadaky paýynyň uly bölegini özünde saklap galdy.
Häzirki wagtda ol Scale AI-yň 5%-e golaý paýyna eýeçilik edýär, bu paýyň bahasy bolsa 1,2 milliard dollar diýip çaklanylýar. Gonuň beýleki aktiwleri, şol sanda Passes atly ikinji startapdaky paýy hem göz öňünde tutulanda, onuň umumy baýlygy 1,25 milliard dollara ýetýär.
«Dogrusy, bu barada kän bir oýlanyp duramok, sebäbi bu gaty geň. Gynansagam, bularyň hemmesi diňe kagyz ýüzünde» — diýip, Lýusi öz milliarder statusy baradaky garaýyşyny aýtdy.
Lýusi Go 40 ýaşdan kiçi bolup, baýlygyny özi gazanan alty zenan milliarderiň biridir. Ol şol bir wagtyň özünde, baýlygynyň köp bölegini birnäçe ýyl öň taşlap gaýdan kompaniýasyndan gazanan ýeke-täk adamdyr.
Ol Hytaýdan göçüp gelen immigrant maşgalanyň gyzydyr. San-Fransisko aýlagynyň etegindäki sebitde ulalypdyr we orta mekdepde okaýan döwri programmirleme bilen gyzyklanyp başlapdyr. Karnegi-Mellon uniwersitetinde informatika we adam bilen kompýuteriň özara gatnaşygy boýunça bilim alyp başlapdyr. Ýöne diplomyny almazyndan öň okuwy taşlap, milliarder maýa goýujy Piter Til tarapyndan maliýeleşdirilýän Til stipendiýa maksatnamasyna gatnaşmaga karar beripdir. Bu maksatnama ýaş telekeçilere öz kompaniýalaryny döretmäge mümkinçilik berýär. 2015-nji ýylda Go Quora atly kompaniýada önüm dizaýneri bolup işläp başlady, şol ýerde hem Wan bilen tanyşdy. Soňra Quora-dan çykyp, Snapchat-de hem biraz işledi, ol ýerde hem önüm dizaýny bilen meşgullandy. Ahyrynda, 2016-njy ýylda Wan bilen bilelikde Scale AI atly kompaniýany esaslandyrmaga karar berdiler.
Maglumatlara görä, Lýusi meşhur adamlar bilen gatnaşýan şadyýan we şowhunly jemgyýetçilik durmuşyny ýöredýär. Onuň dostlarynyň arasynda Bekhem maşgalasy hem bar.
Belläp geçsek, ozal iň ýaş zenan milliarderleriň sanawynyň başynda Teylor Swift bardy. Ol Eras Tour şüweleöinden alan girdejileri bilen Riannadan öňe geçipdi.
