“Formula-1-iň” ýaryşa gatnaşyjysy Lýuis Hemilton Dior bilen bilelikde erkekleriň täze egin-eşik kolleksiýasyny çykardy. Bu barada Women’s Wear Daily habar berýär.
Hemiltonyň Marokko, Mozambik, Benin, Madagaskar we Senegal ýaly ýurtlara syýahaty oňa täze kolleksiýany döretmek üçin ylham çeşmesi bolup hyzmat etdi. Britaniýaly ýaryşa gatnaşyjy bu ýurtlara geçen ýyl baryp gördi. Onuň sözlerine görä, ony ýerli halklaryň taryhy we medeniýeti ruhlandyrdy we ol muny modanyň üsti bilen görkezmek kararyna geldi.
“Afrofuturizm maňa bu kolleksiýany görkezmegiň iň gowy usuly bolup göründi. Men afroamerikan medeniýetiniň geljegini göz öňüne getirmäge ruhlandyran köp sanly täsin wakalary eşitdim. Biziň sungatyň, ylmyň we filosofiýanyň üsti bilen taryhy gürrüň berip bilmegimiziň özi, hakykatdanam, üýtgeşik. Meni bu pikirleriň reňkleriň we hereketleriň kömegi bilen durmuşa geçirilmegi ruhlandyrdy” – diýip, Hemilton paýlaşdy.
Dior kolleksiýanyň Lýuisiň diňe bir sport stilini däl, eýsem has şahsy tarapyny-da görkezýändigini belleýär.
Kolleksiýanyň stili ýiti reňkleri, haýwanlaryň şekillerini, erkin biçüwi we dürli elementleriň sazlaşygyny birleşdirýär. Oňa aýakgaplar we torbalar hem girdi.
Bu Hemilton bilen Dior-yň ilkinji hyzmatdaşlygy däl. 2024-nji ýylyň güýzünde Hemilton brendiň mahabat kampaniýasyna gatnaşdy we ýaryşlardan öňki çärelerde Dior-yň eşiginde peýda boldy.
