Dil öwretmek boýunça okuw sapaklary bilen tanalýan Duolingo programmasy täze okuw ugruny – küşti goşar. Ol ýaňy başlan küştçülere niýetlenip, oýnuň esasy düzgünlerini öwredýär. Ilkibaşda okuwlar iňlis dilli iOS ulanyjylary üçin elýeterli bolar diýip, The Verge we CNET ýazýar.
Ilkibaşda programma bilim derejäňizi – hiç zat bilmezlikden ortaça çenli – kesgitleýär we şoňa görä ýumuşlary saýlaýar. Mysal üçin, ilki ulanyja mallaryň nähili göçüm edýändigi, soňra garşydaşyň mallaryny nähili almalydygy we ýatuwy yglan etmelidigi düşündiriler. Ýygy-ýygydan ýalňyşylan ýagdaýynda dogry göçümi görkezmek bilen kömek ediler.
Her bir okuw bölümi Elo ulgamy boýunça bellibir derejä gabat gelýär. Ýumuşlar Duolingo-nyň dil okuwlary ýaly geçdigiňçe kynlaşýar.
Ulanyjylar küşt boty Oskara garşy kiçi oýunlary we doly döwleri oýnap biler. Onuň çylşyrymlylygy kem-kemden ýokarlanýar.
“Birinji hepdeden soň siz grossmeýster derejesi bilen ýüzbe-ýüz bolarsyňyz, ýöne arkaýynlaşmak bolmaz – Oskar ýalňyşyňyz üçin jezalandyrar” – diýip, işläp düzüjiler aýdýar.
Häzirlikçe beýleki ulanyjylara garşy oýnap bolmaýar, ýöne şeýle mümkinçilik hem göz öňünde tutulýar.
Beta-synag iňlis dilli ulanyjylar üçin iOS-da başlar. PR Duolingo boýunça direktor Monika Erliň aýtmagyna görä, ýene 4-6 hepdeden okuw giňeldiler, soňra Android we beýleki diller üçin sazlanar.
Belläp geçsek, ozal Duolingo-da aýdym-saz notalary we matematika boýunça okuwlar hem peýda boldy.
