Şanhaýda 21-nji halkara awtosalon öz işine başlady. Ol 10 gün, 23-nji aprelden 2-nji maýa çenli dowam eder. Guramaçylar bu döwürde sergä 1,3 mln adamyň gelmegine garaşýar.
Sergide 100-den gowrak täze ulag görkeziler. Oňa 26 ýurtdan we sebitden 1000-den gowrak kompaniýa gatnaşýar. Myhmanlar Audi, BMW, Cadillac, Mazda, Nissan, Mercedes-Benz, Ford, Honda, Porsche, Toyota, Volvo we beýleki brendleriň täze awtomobillerini görüp biler. Öz ulaglaryny BYD, Exeed, Li Auto, Hongqi, Xiaomi, XPeng, Zeekr ýaly hytaý öndürijileri hem görkezer.
Mysal üçin, Audi we Mercedes-Benz bu sergä A5 we CLA modelleriniň uzaldylan görnüşlerini getirdi. Lexus täze nesil ES sedanyny görkezer. Mazda we Honda hem täze krossowerleri taýýarlaýar. Volkswagen we BMW kompaniýalary bolsa sergide birbada birnäçe model görkezmegi meýilleşdirýär.
Şanhaýda awtosalonyň taryhy 1921-nji ýylda başlady. Şol wagt ýerli awtodilerler bambuk karkasly pawilýonlary gurup, ilkinji sergini geçirdi. Häzirki günde awtosalon dört ýaprakly kleweriň şekilinde gurlan National Exhibition and Convention Center (NEEC) toplumynda geçirilýär. Bu dünýäde iň uly sergi merkezidir.
