OpenAI kompaniýasynyň ýolbaşçysy Sem Altman X sosial torunda ulanyjylaryň biriniň beren soragyna jogap berip, adamlaryň ChatGPT bilen söhbetdeşlikde ulanýan «sag bol» we «haýyş» ýaly adaty sözlerini işlemek üçin kompaniýanyň millionlarça dollar çykdajy edýändigini aýtdy. Bu barada «Tom's Hardware» ýazýar.
Altman bu çykdajylaryň onlarça million dollara ýetýändigini belledi, ýöne bu mukdaryň haýsy döwri öz içine alýandygyny anyklaşdyrmady. Şeýle-de bolsa, ol bu pullaryň peýdasyz däldigini, ýagny ýerlikli sarp edilendigini aýtdy. Görnüşine görä, ol adamkärçilikli aragatnaşyk medeniýetiniň hatda çat-bot bilen gatnaşyklarda-da saklanylmalydygyna ynanýar.
Çat-bota berilýän her bir sorag serwerleriň jogap bermek üçin energiýa sarp etmegine sebäp bolýar. Soňky hasaplamalara görä, GPT-4 diňe 100 söz döretmek üçin, üç çüýşe suw sarp edýär, bu suw serwerleriň sowadylmagy üçin ulanylýar. Şeýle-de munuň üstüne gönüden-göni sarp edilýän elektrik energiýasy hem goşulýar.
