Hytaýyň Huawei tehnoägirdi bilen SAIC awtokonserni hyzmatdaşlykda Shangjie atly täze elektromobil brendiniň döredilýändigini yglan etdiler. Bu brendiň ilkinji awtoulagy 2025-nji ýylyň güýzünde satuwa çykar. Bu barada Huawei Consumer Business Group-yň ýolbaşçysy Riçard Ýu Hytaýda geçirilen çäräniň dowamynda habar berdi.
Ýunyň aýtmagyna görä, taslamanyň başlangyç tapgyryna 6 milliard ýuan (takmynan, 820 million dollar) maýa goýuldy we onuň üstünde 5 müňden gowrak işgär işleýär.
Shangjie awtoulaglary SAIC-niň önümçilik hatarlarynda öndüriler, ýöne geljekde bu brendiň öz zawody bolar.
Täze brend HIMA bileleşiginiň bäşinji agzasy boldy. Häzirki wagtda bu bileleşige Aito, Luxeed, Stelato we Maextro brendleri hem girýär. Huawei we onuň hyzmatdaşlary häzirki wagtda ýedi sany elektrokar modelini öndürýärler. Shangjie tarapyndan hödürlenjek täze model bolsa iň arzan wariant bolar. Onuň bahasy, takmynan, 150 müň ýuan (takmynan, 20 müň dollar) bolar.
Täze awtoulag SAIC Roewe ES39 platformasynyň binýadynda döredilýär we esasan ýaş alyjylara gönükdirilýär. Onuň satuwy HIMA-nyň satuw kanallary arkaly amala aşyrylar. Häzirlikçe bu brendiň daşary ýurt döwletlerine çykyp-çykmajakdygy barada maglumat ýok.
