Şwesiýanyň «SVT» teleýaýlymy ýüzlerçe loslaryň Ongerman derýasyndan geçýän pursadyny surata düşürmek üçin, 30-dan gowrak uzakdan dolandyrylýan we gijeki görüşli kamerany hem-de 20 müň metr kabel ulanýar diýip, «The Guardian» ýazýar.
Tomaşaçylar bu haýal we lezzetli pursatlara birnäçe günläp tomaşa edýär. Olar loslaryň ýuwaş hereketleriniň arasynda rahatlyk tapýarlar, özlerini tebigat bilen bitewi duýýarlar.
Bu şüweleň we onuň üstünligi soňky ýyllarda barha ösýän «haýal telewideniýe» akymynyň bir bölegidir. Bu düşünjäni ilkinji gezek amerikaly pop sungatçysy Endi Uorhol öňe sürüpdi. Onuň 1964-nji ýyldaky «Uky» (Sleep) atly filminde şahyr Jon Jorno 5 sagat 20 minutlap ukuda pursaty görkezilýärdi.
Bu konsepsiýa ýakyn wagtda Norwegiýanyň «NRK» teleýaýlymy tarapyndan taýýarlanan «Bergensbanen» atly öňünden ýazga alnan dokumental film bilen has-da meşhur boldy. Ýurduň çägindäki demir ýol syýahatyny görkezýän filme Norwegiýanyň ilatynyň bäşden bir bölegi tomaşa etdi. Ondan soň bolsa 134 sagatlyk deňiz syýahatynyň göni ýaýlymy görkezildi, bu şüweleňi bolsa ýurduň ilatynyň tas ýarysy gördi.
Beýleki ýurtlar hem «haýal telewideniýe» boýunça taslamalaryny durmuşa geçirip başladylar. Meselem, Niderlandlarda tomaşaçylar suwasty kamerany dolandyrmak arkaly, balyklaryň köpelýän döwrüne tomaşa edip bilýärler.
