DreamWorks “Unudylan ada” (Forgotten Island) multfilmini anons etdi. Premýera 2026-njy ýylyň 25-nji sentýabryna meýilleşdirilýär diýip, Deadline habar berýär.
Taslamanyň režissýorlary we ssenariçileri bolup Joel Krouford we Hanuel Merkado çykyş eder. Öň olar “Ädikli pişik: Soňky isleg” multfilminiň üstünde işledi. Bu multfilm hem 2022-nji ýylda “Oskar”, BAFTA we “Altyn globus” baýraklaryna dalaşgär görkezildi.
“Unudylan adanyň” sýužeti barada maglumat berilmeýär. Ýöne onuň filippin rowaýatlaryndan ylham alan unudylan jadyly ada düşýän gahrymanlar barada başdangeçirmeler komediýasydygy belli.
Cartoon Brew-iň belleýşi ýaly, täze ideýaly taslamalar DreamWorks üçin seýrek ýagdaý. Çünki, studiýa, köplenç, multfilmleri belli franşizalaryň ýa-da kitaplaryň esasynda çykarýar. Soňky 15 ýylda ýeke-täk üýtgeşme 2023-nji ýyldaky “Rubi Gilman: ýetginjek krakeniň başdangeçirmeleri” boldy, ol hem prokatda üstünlik gazanmady.
DreamWorks-yň soňky taslamasy “Ýabany robot” hakyky şowly çykan multfilm boldy. Ol 78 mln dollar býujet bilen bütin dünýäde 333 mln dollar gazandy. Ol “Oskar” baýragy üçin üç nominasiýada görkezildi we Annie animasion baýragynyň dokuz heýkelini aldy.
