Ýewrokomissiýa (ÝK) onlaýn ýygnaklarda emeli aňa esaslanýan wirtual kömekçileriň ulanylmagyny gadagan etdi. Bu barada Politico gazeti habar berýär.
Bu çözgüt telekeçileriň we sarp edijileriň arasynda şeýle tehnologiýalaryň giňden ýaýraýandygy üçin sorag döredýär.
Duşuşyk başlamazdan öň ekranlarda şeýle ýazgyly slaýd peýda bolýar: “EA agentleriniň ulanylmagyna rugsat berilmeýär”. Gazetiň maglumatlaryna görä, ÝK bu düzgüni geçen hepde girizdi, ýöne onuň sebäplerini düşündirmedi.
ÝK-nyň işewürlikde we gündelik durmuşda EA-nyň giňden ulanylýan döwrüne işjeň taýýarlanýandygy üçin bu gadaganlyk garaşylmadyk boldy. ÝK-nyň 31-nji martdaky wirtual hakykata bagyşlanan resminamalarynda hem EA kömekçileri barada agzaldy. Onda şeýle programmalaryň “wirtual gurşawy kabul edip, onuň bilen aragatnaşyk saklamaga” ukyplydygy aýdylýar.
EA kömekçileri “awtonom işläp biler”, ýöne olaryň işi “öňünden kesgitlenen düzgünler” bilen dolandyrylýar diýlip, resminamada bellenilýär.
