“Rolan Garrosyň” guramaçylary Rafael Nadalyň hormatyna dabara geçirmek meýilnamalary hem-de 2025-nji ýylda ýaryşyň baýrak gaznasynyň artdyrylandygy barada habar berdi.
“Uly tuwulga” ýaryşlarynyň 22 gezek ýeňijisi we Fransiýanyň Açyk çempionatynyň 14 gezek çempiony bolan Nadaly hormatlamak dabarasy 25-nji maýda, Filipp Şatrie kortunda gündizki sessiýanyň üç oýnundan soň geçiriler.
Mundan başga-da, şu ýyl “Rolan Garrosda” çykyşyny tamamlaýan fransuz tennisçisi Rişar Gaske bilen hoşlaşyk guralar. Dabara onuň soňky oýnundan soň bolar.
Ýaryşyň çäklerinde Meri Pirs hem hormatlanar. 2025-nji ýylda onuň Fransiýanyň Açyk çempionatyndaky ýeňşine 25 ýyl dolýar.
Şeýle-de, guramaçylar ýaryşyň baýrak gaznasynyň artdyrylandygyny habar berdi. Ol geçen ýyl bilen deňeşdirilende, 5,21% ýokarlanyp, 56,352 mln ýewro boldy.
Ozal tennisçiler topary “Uly tuwulga” ýaryşlarynyň guramaçylaryna baýrak pullaryny köpeltmek haýyşy bilen hat iberdi. Hatda birinji talap Mutua Madrid Open 2025-de dört ýaryşyň wekilleri bilen ýüzbe-ýüz duşuşykdy.
Hat 21-nji mart bilen senelenýär. Ol Kreýg Taýlä (Awstraliýanyň Açyk çempionaty), Stefan Morele (“Rolan Garros”), Salli Boltona (Uimbldon) we Lýu Şerrä (ABŞ-nyň Açyk çempionaty) gönükdirildi. AP News agentligi soňrak resminama gol çeken tennisçileriň sanawyny hödürledi.
