Mitsubishi Motors ýapon kompaniýasy hem Volkswagen, Stellantis, Audi we Jaguar Land Rover kompaniýalaryndan soň, ABŞ-a awtoulag ibermegi wagtlaýyn togtatdy. Munuň esasy sebäbi ABŞ-nyň hökümeti tarapyndan girizilen täze gümrük paçlary diýip, «Motor1» neşiri habar berýär.
Mitsubishi üçin ýagdaý has-da kyn, sebäbi bu kompaniýanyň ABŞ-da özüne degişli zawody ýok.
Kompaniýa täze paçlaryň ulaglaryň bahasyna we logistika çykdajylaryna nähili täsir etjekdigini seljermek üçin, ulaglaryň iberilişini wagtlaýyn togtatdy. Bu ýagdaý näbellilik döwründe zyýanlary azaltmaga kömek eder. Bu karar amerikan bazarynda «Outlander» we «Eclipse Cross» ýaly meşhur modelleriň azalmagyna getirip biler.
Awtoulaglaryň iberilişiniň haçan yzyna dikeldiljekdigi entek belli däl. Eger täze nyrhlar güýjünde galsa, Mitsubishi awtoulaglarynyň bahasy ýokarlanyp, kompaniýanyň bäsdeşlik ukyby pese gaçyp biler. Uzak wagtlyk arakesme brendiň güýçli bäsdeşleriniň arasyndaky ornuny has-da gowşadyp biler.
