Mercedes-Benz 2026-njy ýylda «Citan» we «T-Class» modelleriniň, şol sanda elektrikli «eCitan» we «EQT-niň» önümçiligini bes eder. Bu barada «Automobilwoche» portaly habar berdi, bu maglumatlar kompaniýanyň wekiliniň «Reuters» agentligine beren beýanaty bilen tassyklandy.
Kompaniýa täjirçilik maksatly kiçi göwrümli ulaglar segmentinde Renault bilen hyzmatdaşlygyny bes etmäge karar berdi. Bu modeller «Renault Kangoo-nyň» esasynda Fransiýadaky zawodda öndürilýär.
Mercedes-Benz Vans bölümi öz işini has girdejili segmentlere gönükdirjekdigini aýtdy. Indi esasy üns orta we uly ölçegli furgonlara berler. Kiçi göwrümli awtoulaglar geljek ýyl önümçilik hataryndan aýrylar, olaryň önümçiligi bolsa 2026-njy ýylyň ortalarynda doly bes ediler.
«Citan» we «T-Class» – täze modeller hasaplanylýar. Içinden ýandyrylýan hereketlendirijili görnüşleri 2021-2022-nji ýyllarda satuwa çykaryldy, elektrikli görnüşleri bolsa soň çykdy. Ýöne olaryň satuwy pes boldy: Mercedes-iň görnüşleri Renault-yňkydan ep-esli gymmatdy, tehniki taýdan bolsa tapawudy ýok diýen ýalydy.
Şonuň ýaly ýagdaý öň «X-Class» pikaby bilen hem ýüze çykypdy. Bu taslama şowsuz boldy, sebäbi müşderiler hereketlendirijisi Mercedes-iňki bolsa-da, Nissan-y saýlapdylar.
Mercedes-Benz-iň täze hyzmatdaşynyň Geely bolmagyna garaşylýar.
