Disney «Ýyldyz söweşleri» älemi boýunça horror taýýarlaýar. Bu barada «Andor» serialynyň döredijisi, režissýor Toni Gilroý «Business Insider» neşiri bilen söhbetdeşlikde mälim etdi.
Franşizanyň çäginde horror bilen bagly özüniň näme etjekigi barada soralanda, Gilroý şeýle jogap berdi: «Olar eýýäm bu iş bilen meşgullanýarlar. Meniň pikirimçe, hawa, olar munuň üstünde işleýärler. Eýýäm taýýarlap başladylar öýdýän».
Bu filmmi ýa serialmy ýa-da täze formatdaky taslamamy, entek belli däl. Şeýle-de onuň üstünde kimleriň işleýändigem entek belli däl.
«IGN» neşiriniň maglumatlaryna görä, «Ýyldyz söweşleri» boýunça doly göwrümli horror döretmek pikiri köp wagtdan bäri muşdaklaryň arasynda maslahatlaşylýar. Şeýle çemeleşmä goldaw berenleriň biri hem Lýuk Skaýuokeriň keşbini ýerine ýetiren aktýor Mark Hemilldir.
Her näçe käbir spin-off taslamalary bu älemiň has garaňky we çynlakaý taraplaryny görkezdi diýilse-de, esasy uly göwrümli taslamalar entek hem giň tomaşaçy köpçüligine gönükdirilýär.
«Andor» serialy franşizanyň has uly ýaşly tomaşaçylar üçin niýetlenen görnüşi hökmünde görkezilýär. 2022-nji ýylda ýaýlyma berlen ilkinji möwsümde ýagty gylyçlar we fantastiki mahluklar ýokdy. Käbir tankytçylar bu serialy «soňky döwrüň iň gowy „Ýyldyz söweşleri“ diýip atlandyrdy.
«Andor» serialynyň ikinji möwsüminiň ilkinji üç bölümi 22-nji aprelde tomaşaçylara hödürlener.
