Bütindünýä saglygy goraýyş guramasyna (BSGG) agza ýurtlaryň wekilleri geljekde ýüze çykyp biljek pandemiýalaryň öňüni almak maksady bilen taýýarlanylýan halkara şertnamanyň esasy maddalary boýunça ylalaşyga geldiler. «Reuters» agentliginiň gepleşik toparynyň egindeş başlygyna salgylanyp beren habaryna görä, resminamanyň soňky görnüşi 15-nji aprelde Ženewada maslahatlaşylar.
Bu resminamanyň üstünde birnäçe ýyl bäri iş alnyp barylýar. Hökümetara gepleşik toparynyň wekili Ann-Kler Amprunyň aýtmagyna görä, gatnaşyjy ýurtlar möhüm maddalar boýunça umumy pikirde birleşmegi başardy. Indi bu şertnamany ýurtlaryň milli hökümetleriniň makullamagyna garaşylýar.
Şertnama soňky görnüşinde ylalaşylandan soň, ol Bütindünýä saglygy goraýyş assambleýasynyň garamagyna ugradylar, bu assambleýa bolsa maý aýynda Ženewada geçiriler.
«Reuters» agentliginiň maglumatlaryna görä, şertnamanyň iň jedelli bölegi 11-nji madda boldy, ol ösüp barýan ýurtlara tehnologik serişdeleriň berilmegi bilen baglanyşyklydy. Latyn Amerikasy ýurtlary sanjymlaryň we test serişdeleriniň öndürilişine elýeterliligi üpjün edip biljek mehanizmleri döretmegi ileri tutýarlar. Şol bir wagtyň özünde, derman senagaty ösen ýurtlaryň wekilleri bu prosesi meýletin ýagdaýda galdyrmagy talap etdiler.
Agentligiň çeşmeleriniň bellemegine görä, bu mesele boýunça hem belli bir ylalaşyk gazanyldy, ýöne resminamanyň iň soňky görnüşi entek köpçülige hödürlenmedi.
