OpenAI kompaniýasy ChatGPT-ni täzeledi. Indi ol ulanyjynyň ozalky ähli gürrüňlerine salgylanyp, has şahsylaşdyrylan jogaplary berip bilýär. Täze funksiýa jogaplary has takyk, maslahatlary has ähmiýetli we özara gatnaşygy bolsa has «adamyňky ýaly» edýär. Bu barada «The Verge» neşiri habar berýär.
Täze ýat funksiýasynyň kömegi bilen, ChatGPT her gürrüňdeşlikde siziň gyzyklanmalaryňyzy, gepleşik stiliňizi we öň gürrüň eden temalaryňyzy göz öňünde tutýar. Bu mümkinçilik awtomatiki ýagdaýda işleýär, emma isleseňiz sazlamalardan bu funksiýany öçürip ýa-da gürrüňleriň taryhyna elýeterliligini çäklendirip bilersiňiz.
«Bu funksiýa meniň pikirimçe, geň galdyryjy derejede ajaýyp. Bu bolsa bizi hakykatdan-da tolgundyrýan bir zady görkezýär: ömrüň dowamynda seni gitdigiçe has gowy tanaýan we iň peýdaly, şahsylaşdyrylan görnüşe öwrülýän EA ulgamlary» — diýip, OpenAI-yň ýolbaşçysy Sem Altman ýazdy.
Bu mümkinçilik 11-nji aprelden başlap, Plus we Pro abunalygyna ýazylan ulanyjylar üçin elýeterlidir, ýöne ÝYZ-na degişli ýurtlarda, Beýik Britaniýada, Şweýsariýada, Norwegiýada, Islandiýada we Lihtenşteýnde elýeterli däl. Team, Enterprise we Edu hasaplaryny ulanýanlar bolsa, bu mümkinçilige indiki hepdelerde eýe bolar.
