Ýewropa kosmos agentligi (ESA) Marsyň täze düşürilen suratlaryny çap etdi. Bu suratlarda planetanyň dürli ýerlerindäki relýefiň näderejede tapawutlanýandygy aýdyň görünýär. Suratlar 2003-nji ýyldan bäri Marsy öwrenýän Mars Express enjamynyň toplan maglumatlarynyň esasynda taýýarlanyldy.
Suratlarda Gyzyl planetanyň bir böleginiň gatap galan lawalar bilen örtülendigini we relýefiniň birneme tekizräkdigini görmek bolýar. Beýleki künjek bolsa has gadymy bolup, kraterleri we geologik şekilleri bilen tapawutlanýar. Bu tapawutlar ýokary çözgütli HRSC stereokamerasy bilen düşürilen täze suratda örän aýdyň görünýär.
Suratdaky sebite Aheron keşi (Acheron Fossae) diýilýär, ol planetanyň demirgazyk ýarymşarynda ýerleşýär. Bu sebit Marsdaky iki sany uly wulkana ýakynlygy sebäpli, alymlaryň ünsüni özüne çekýär. Onuň 1200 kilometr günorta tarapynda Olimp dagy ýerleşýär, takmynan, şonça uzaklykda demirgazyk-gündogar tarapda bolsa Alba dagy ýerleşýär. Bu wulkanlar suratda görünmeýär, emma olaryň sebitiň geologiýasyna täsiri uly hasaplanylýar.
Curiosity mars roweri hem iki sany täze panorama surat paýlaşdy. Suratlarda roweriň käbir bölekleri bilen bilelikde daşly-çägeli çöl landşaftyny hem görmek bolýar.
«Bu Mars. Bizden 225 mln kilometr uzaklykda» — diýip, roweriň X sosial torundaky sahypasynda ýazylýar.
