Google kompaniýasy Cloud Next konferensiýasynda Google Firebase Studio atly täze bulut platformasyny tanyşdyrdy. Bu platforma mobil we web programmalary emeli aňyň kömegi bilen çalt hem-de kodlama boýunça çuň bilim bolmazdan döretmäge mümkinçilik berýär.
Ulanyjylar GitHub, GitLab ýa-da kompýuterindäki taslamalary ýükläp, 60 sany taýýar şablondan birini saýlap ýa-da tekst, surat ýa eskiz arkaly programmany başdan döredip bilerler. Mysal üçin, bir maketiň suratyny ýükläniňizde, emeli aň interfeýsi we API-ni awtomatiki döredýär. Soň şol programmany Google-yň buludyna ýa-da öz serweriňize ýerleşdirip bolýar.
Google-yň Gemini emeli aň ulgamy dokumentasiýa ýazmak, ýalňyşlary düzetmek, baglanyşykly faýllary dolandyrmak we synag geçirmek ýaly işleri ýeňilleşdirýär. Platforma Java, Python, Go, Node.js ýaly dilleri, şeýle-de React we Flutter ýaly freýmworklary goldaýar.
Firebase Studio taslamalaryny çalt synagdan geçirmek we işe girizmek isleýän startaplar we kiçi toparlar üçin amatly çözgütleri hödürleýär. Ulanyjylar platformany Replit we Cursor AI bilen deňeşdirip, ähli işleriň bir ýerde jemlenmegini artykmaçlyk hökmünde belleýärler.
Google ýakyn aýlarda platformanyň mümkinçiliklerini giňeltmegi, täze şablonlary goşmagy we daşarky hyzmatlar bilen has gowy integrasiýalary üpjün etmegi meýilleşdirýär.
