2025-nji ýylyň 23-24-nji aprelinde Malaýziýanyň Kuala-Lumpur şäherinde Türkmenistanyň ykdysadyýetine daşary ýurt maýa goýumlaryny çekmek boýunça halkara göçme forumy geçirmek göz öňünde tutulýar.
Anna güni geçirilen Hökümet mejlisiniň barşynda wise-premýer B.Amanow foruma görülýän taýýarlyk işleri barada hasabat berdi.
Bellenilişi ýaly, foruma gatnaşmaga 30 döwletden 300-e golaý wekil hasaba alyndy we häzirki wagtda hasaba almak işi dowam edýär. Şeýle hem forumyň dowamynda türkmen wekiliýetiniň agzalarynyň gyzyklanma bildirýän daşary ýurt kompaniýalarynyň wekilleri bilen duşuşyklaryny geçirmek meýilleşdirilýär. Şunuň bilen baglylykda, wise-premýer Türkmenistanyň Prezidentiniň garamagyna degişli teklibi hödürledi.
Döwlet Baştutany hasabaty diňläp, ýurdumyzyň ähli pudaklaryny sazlaşykly ösdürmegiň möhüm wezipe bolup durýandygyny aýdyp, wise-premýere Malaýziýada guraljak Türkmenistanyň ykdysadyýetine daşary ýurt maýa goýumlaryny çekmek boýunça halkara göçme forumy ýokary derejede geçirmegi tabşyrdy.
