Ýewropa kosmos agentligi (ESA) Aral deňziniň 2025-nji ýylyň martynda Sentinel-2 emeli hemrasy tarapyndan düşürilen suratyny çap etdi.
Gazagystan bilen Özbegistanyň araçäginde ýerleşýän suw howdany bir wagtlar Merkezi Aziýadaky iň uly suw giňişlikleriniň biridi. Emma 1960-njy ýyllarda Syrderýa bilen Amyderýanyň suwlary pagta meýdanlaryny suwarmak üçin başga tarapa ugrukdyryldy. Şondan soň deňiz çalt kiçelip, gurap başlady.
Täze düşürilen suratda Aral deňziniň günbatar böleginiň ep-esli kiçelendigi, gündogar böleginiň bolsa doly diýen ýaly gurandygy görnüp dur. Suwuň gurap galan ýerinde gurak meýdan peýda bolupdyr. Suratda ozal deňziň düýbüniň bolan ýerinde açyk reňkli meýdan göze ilýär. Indi bu ýerlere Aralgum çöli diýilýär. Ol Ýerdäki iň ýaş çöl hasaplanylýar.
