Trampyň täze gümrük paçlaryny girizjekdigi barada çykan habarlardan soň, ABŞ-da iPhone-laryň we beýleki Apple enjamlarynyň satuwy ep-esli artdy diýip, «Bloomberg» neşiri ýazýar.
Žurnalistleriň anyklamagyna görä, soňky günlerde Apple-yň dükanlary adamdan doly. Olaryň käbirileri bahalaryň ýokarlanmagyndan ätiýaç edip, tehniki enjamlary satyn alýar, käbirileri bolsa Apple-yň işgärlerinden Trampyň girizen paçlarynyň iPhone-laryň we Mac kompýuterleriň bahalaryna täsir edip-etmejekdigi barada maglumat almaga çalyşýar.
«Bloomberg-iň» çeşmesiniň berýän maglumatlaryna görä, geçen dynç günlerinde Apple şeýle gaty köp smartfon satmagy başardy welin, bu görkezijiler hatda soňky döwürde iň uly bazarlardaky satuwlary hem geçdi. Şeýle-de bolsa, kompaniýa bu ýagdaý bilen bagly düşündiriş bermedi.
Bahalaryň ýokarlanmagynyň öňüni almak üçin, kompaniýa täze enjamlar bilen doly birnäçe uçar bilen golaýda ABŞ-a haryt getirdi.
