Mercedes-Benz Trucks Germaniýanyň Mýunhen şäherinde geçirilen Bauma sergisinde «eArocs 400» atly elektrik ýük ulagyny tanyşdyrdy. Gurluşyk pudagy üçin işlenip düzülen model beton garyjy we ýük ulagy görnüşlerinde elýeterlidir. Ol hiç hili zyňyndylary döretmeýär we ses çykarman işleýär.
Ulagyň batareýasynyň kuwwaty 414 kWt·sag bolup, ol beton garyjy görnüşinde 200 km çenli, ýük ulagy görnüşinde bolsa 240 km çenli ýol geçmäge ukyply. Batareýany 20%-den 80%-e çenli zarýadlamak üçin, 400 kWt kuwwatly zarýadda, takmynan, 45 minut gerek.
Täze ulagyň 380 kWt-da (hemişe) we 450 kWt-da (iň ýokary) işleýän hereketlendirjisi, şeýle hem 3 basgançakly geçiriş gutusy (karobkasy) bar. Onuň ýük göterijiligi – 32 ýa-da 41 tonna. Kabinasyna 12 dýuýmlyk displeý we ses arkaly dolandyrylýan sensor ekran ýerleşdirilen. Howpsuzlyk ulgamyna tiz saklanmak we päsgelçilikleri anyklamak funksiýalary girýär.
«eArocs 400» pes zyňyndyly sebitlerde we ýuwaş ýerlerde ulanmak üçin amatlydyr. Ilkinji 150 ulag 2026-njy ýylda ÝB bazary üçin öndüriler. Satuwlar birinji çärýekde başlar, eltip bermeler bolsa üçünji çärýekde amala aşyrylar.
