Aktrisa Keýtlin Diwer sosial torlarda Godzilla bilen King Kong baradaky täze filmiň surata düşürilip başlanandygyny habar berdi. Filmiň önümçiliginiň näçe wagt dowam etjekdigi belli däl diýip, «CBR» habar berýär.
Täze filmiň režissýory hökmünde Grant Spýutor çykyş eder. Ol 2024-nji ýylda çykan filmiň režissýory we ssenaristi bolan Adam Wingardyň ornuna geçer. Filmiň aktýorlar düzümine Jek O’Konnell bilen Delroý Lindo hem goşular. Filmiň mazmuny baradaky maglumatlar entek aýan edilmedi.
«Täze imperiýa» (Годзилла и Конг: Новая империя) filminiň wakalary 2021-nji ýylda çykan «Godzilla vs. Kong» filminiň soňunda bolup geçen wakalardan soň dowam edýärdi. Ýeriň iň güýçli iki jandary bu gezek täze howp bilen ýüzbe-ýüz bolupdylar. Bu film dünýä boýunça 571 million dollar girdeji gazanyp, bu kinoälemiň iň köp tomaşa edilen filmi bolupdy.
Täze filmiň premýerasy 2027-nji ýylyň 26-njy martyna meýilleşdirilýär.
