Apple korporasiýasy mart aýynyň soňky üç gününde Hindistandan ABŞ-a iPhone we beýleki tehnika bilen 5 sany ýük uçaryny iberdi. Kompaniýa ABŞ-nyň Prezidenti tarapyndan täze gümrük haklarynyň girizilmeginiň täsirini gowşatmaga howlukdy diýip, Hindistandan ýokary wezipeli döwlet işgärine salgylanyp, The Times of India habar berýär. Bu paçlar aprel aýynda güýje giripdi.
Şeýle-de, žurnalistleriň maglumatlaryna görä, mart aýynda korporasiýa Hytaýdaky kärhanalardan hem önümleriň iberilmegini çaltlaşdyrdy.
Çak edilişine görä, beýleki ýurtlardan ABŞ-a getirilen goşmaça tehnika toplumlary Apple-e öz önümleriniň bahasyny birbada ýokarlandyrmazlyga mümkinçilik berer: Apple-iň ABŞ-daky ammarlarynda haryt ätiýaçlygy birnäçe aýa ýeterlik bolmaly. Rosenblatt Securities-iň maglumatlaryna görä, şondan soň ABŞ-da iPhone-yň bahasy 43% ýokarlanyp biler.
Paçlaryň ýokarlanmagyndan öň harytlary köpçülikleýin satyn almaklyk beýleki amerikan kompaniýalaryna hem täsir etdi. Xeneta-nyň hasaplamalaryna görä, martyň soňky hepdelerinde Hytaýdan ABŞ-a gyssagly awia-eltip berme hyzmatynyň bahasy 37% ýokarlandy.
Donald Tramp aprel aýynyň başynda dünýäniň ähli döwletleri üçin diýen ýaly täze paçlary girizdi. ABŞ-nyň Prezidenti ýurduň “onýyllyklaryň” dowamynda beýleki ýurtlaryň “biziň önümlerimize ýokary nyrhlary goýan wagty”, bu ýurtlar bilen gatnaşykda söwda päsgelçiliklerini gowşadandygyny belledi. Şeýle-de, ABŞ-nyň paçlary peseltmek barada Wýetnam, Ysraýyl we Hindistan bilen gepleşiklere başlandygy habar berildi.
