Nissan Motor kompaniýasy ABŞ-a eksport edilýän ulaglaryň bir bölegini Ýaponiýada öndürmegiň deregine, önümçiligiň bir bölegini ABŞ-a geçirmegi göz öňünde tutýar. Bu ýagdaý ABŞ-nyň prezidenti Donald Trampyň bütin dünýä ýurtlaryna garşy gümrük paçlaryny ýokarlandyransoň ýüze çykdy diýip, «Nikkei» gazetine salgylanyp, «Reuters» neşiri habar berýär.
Nissan eýýäm şu tomusda Ýaponiýanyň günbatarynda ýerleşýän Fukuoka şäherindäki zawodynda önümçiligi peseldip, «Rogue» kysymly ulaglaryň önümçiliginiň bir bölegini ABŞ-a geçirmek isleýär. Bu çäre Trampyň girizen gümrük paçlarynyň täsirini ýeňletmek üçin görülýär. Habarda aýdylmagyna görä, ýapon awtoulag öndürijisiniň ABŞ bazaryndaky esasy modeli bolan «Rogue» häzirki wagtda hem Fukuokada, hem-de ABŞ-da öndürilýär.
Geçen penşenbe güni Nissan Meksikada öndürilýän Infiniti kysymly iki ulagy üçin ABŞ-dan täze sargytlary kabul etmejekdigini mälim etdi.
Şeýle hem Nissan şu ýylyň ýanwarynda, aprel aýynda iki çalşykly önümçiligiň ýatyryljakdygyny yglan etse-de, häzirki wagtda ABŞ-nyň Tennessi ştatynyň Smirna şäherindäki zawodynda «Rogue» ulaglarynyň önümçiligini iki çalşykda dowam etdirmek isleýär.
«Nikkei» gazetiniň maglumatlaryna görä, Nissan geçen ýyl ABŞ-da, takmynan, 920 müň awtoulag satypdyr. Şolardan 16%-e golaýy bolsa Ýaponiýadan eksport edilipdir.
