Filippinlerdäki Negros adasynda ýerleşýän Kanlaon wulkany ýene-de işjeňleşdi. Wulkan atylyp, 4 kilometr beýiklige çenli kül zyňdy diýip, «South China Morning Post» bilen «Reuters» habar berýär.
Kanlaon – ýurt boýunça işjeň 24 wulkanyň biridir. Onuň beýikligi 2435 metre ýetýär diýip, Britannica ensiklopediýasynda ýazylýar.
Wulkan mundan ozal dekabr aýynda işjeňleşipdi. Şol wagt golaýdaky obalaryň ýaşaýjylary mejbury göçürilipdi. Soňky atylma mahaly hem adada ewakuasiýa bilen bagly çäreler güýjünde galypdy, ýagny ýaşaýjylaryň yzyna gaýdyp gelmegine rugsat berlenokdy.
Filippinleriň wulkanologiýa we seýsmologiýa institutynyň (PHIVOLCS) habaryna görä, dekabr aýyndan bäri, wulkanyň töweregindäki howpuň derejesi üçünji basgançakda saklanyp gelýär. Bäş basgançakly ölçeg boýunça üçünji dereje – lawanyň zyňylmak töwekgelçiliginiň ýokarlanandygyny we atylmanyň birnäçe hepdeläp dowam edip biljekdigini aňladýar. Institutyň ýolbaşçysy Teresito Bakolkol bu ýagdaýyň üýtgäp biljekdigini aýdýar. Onuň pikirine görä, ýakyn wagtda howpuň derejesi ýokarlanyp hem biler, peselip hem. Bularyň ählisi magmanyň ýeriň ýüzüne näderejede çalt çykjakdygyna bagly bolar.
Filippinler Ýuwaş ummanynyň wulkaniki ot halkasynda ýerleşýär. Bu sebitde wulkanlaryň atylmagy we ýertitremeler ýygy-ýygydan bolup geçýär.
Ýatlatsak, Gawaý adalaryndaky Kilauea wulkany hem 25-nji martda işjeňleşip, ertesi gün 200 metr beýiklige lawa zyňypdy.
