«Renault 5» modeli «EV van het Jaar 2025» baýragynda orta bahaly ulaglar boýunça 2025-nji ýylyň iň gowy elektromobili diýlip yglan edildi. Bu baýrak her ýyl AutoWeek, LeasePlan we beýleki guramalaryň gatnaşmagynda gowşurylýar diýip, «Autoweek» portaly habar berýär.
Emin agzalary awtoulaglara 9 ölçeg boýunça baha berdi: bir gezeklik zarýad bilen geçýän ýoly, zarýad alyş tizligi, bahasy, sürüş rahatlygy, amatlylygy, satuw derejesi we beýleki möhüm görkezijiler.
«Renault 5» elýeterli bahasy we tehnologik aýratynlyklary bilen «Opel Corsa» we «Volvo EX30» ýaly bäsdeşlerini yzda galdyrdy.
Has ýokary synpdaky kategoriýada ýeňiji «Renault Megane E-Tech Electric» boldy. Ol «Volkswagen ID.3» bilen «Cupra Born» modellerini yzda galdyrdy.
Premium elektromobiller kategoriýasynda iň gowy model hökmünde «Tesla Model 3» saýlandy.
Iň ýokary (top) synpda bolsa ýeňiji hytaý awtoulagy «Zeekr 001» boldy. Bu model «Volkswagen ID.7» bilen «BMW i5-den» öňe geçdi.
Şeýle-de «Hyundai Inster» barada hem aýratyn bellenilip geçildi – ol «2025-nji ýylyň geljegi uly modeli» diýlip atlandyryldy. Heniz ähli ölçegler boýunça doly baha berilmese-de, bu model bahasy bilen aýratynlyklarynyň sazlaşygy sebäpli uly ynam döredýär.
Baýrak alan modeller elektromobil satyn almagy meýilleşdirýänler üçin gyzyklanma döredýär – sebäbi bular hem şäher içinde sürmek, hem-de gündelik ulanyş üçin amatly bolup durýarlar.
