Russiýaly hokkeýçi Aleksandr Oweçkin yzygiderli MHL çempionatlarynda ähli döwrüň iň gowy snaýperi boldy. “Waşington Kepitalzyň” kapitany “Nýu-Ýork Aýlenders” bilen oýunda 895-nji şaýbasyny geçirip, uzak wagtdan bäri mümkin däl hasaplanan kanadaly Ueýn Gretskiniň rekordyny täzeledi.
Oweçkin ikinji tapgyryň altynjy minutynda tapawutlandy. Oýunda hasap “Aýlendersiň” peýdasyna 2:1 boldy. Şondan soň oýun taryhy pursaty bellemek üçin togtadyldy. Russiýaly hokkeýçini iki toparyň hem oýunçylary, MHL-iň wekilleri we tanymal Ueýn Gretskiniň özi gutlady.
Oweçkin öz ýoldaşlaryna, muşdaklaryna, dostlaryna we maşgalasyna goldawlary üçin minnetdarlyk bildirdi – onuň aýaly, ogullary we ejesi arena çykdy. Hokkeýçi “hokkeýiň toparlaýyn oýundygyny” we ýoldaşlarynyň kömegi bolmazdan munuň mümkin däldigini aýtdy.
Gretskiniň rekordy 26 ýyl saklandy. Stenli kubogynyň dört gezek eýesi 1999-njy ýylyň martynda MHL-de 1487-nji oýnunyň dowamynda öz 894-nji goluny geçirdi. Russiýaly türgene bu rekord belligine ýetmek üçin bir oýun az gerek boldy.
“Waşington Kepitalzyň” oýunçysy rekorda ýetmäge Gretskiniň goldawynyň kömek edendigini aýtdy.
Oweçkin Russiýanyň milli ýygyndysynyň düzüminde üç gezek dünýä çempiony we “Waşington” bilen 2018-nji ýylyň Stenli kubogynyň eýesidir. Ol 2005-nji ýyldan bäri MHL-de tutuş karýerasyny “Kepitalz” bilen geçirdi.
