36 ýaşly nemes futbolçysy Mats Hummels professional karýerasynyň tamamlanandygyny yglan etdi. Ol muny sosial ulgamlarda habar berdi.
"Tamam boldy. Gör, nähili syýahat! Sag boluň" – diýip, oýunçy ýazdy.
Hummels merkezi goragçy bolup oýnady. Ol karýerasyna Mýunheniň “Bawariýasynda” başlady, soňra Dortmundyň “Borussiýasyna” geçdi, oýunlarynyň köpüsini – 508 oýny şu topar üçin oýnady. Şol oýunlarda ol 38 gol geçirdi we 23 gezek netijeli pas berdi. “Dortmunt B” futbolçynyň beýanatyna minnetdarlyk sözleri bilen seslendiler.
“Borussiýanyň” taryhynda, Bundesligada we dünýä futbolunda çykyş eden beýik oýunçylaryň biri. Hemme zat üçin sag bol, Mats, sen köp zat gazandyň! Ajaýyp karýeraň bilen gutlaýarys! Gara-sarylar hemişelikdir" – diýip, nemes klubunyň sosial ulgamlardaky beýanatynda aýdylýar.
Hummels häzirki wagtda Italiýanyň “Roma” klubunda oýnaýar.
Hummels öz karýerasynda bäş gezek: iki gezek “Borussiýa” we üç gezek “Bawariýa” bilen Germaniýanyň çempiony boldy. Şeýle hem ol üç gezek Germaniýanyň kubogyny we 5 gezek Germaniýanyň Super kubogyny aldy.
Goragçy 2014-nji ýylda Germaniýanyň milli ýygyndysynyň düzüminde dünýä çempiony boldy.
