Hytaý ABŞ-dan getirilýän harytlara garşylyklaýyn salgytlary girizýär

  • 05.04.2025 08:34
  • 6.3k+

Hytaýyň Maliýe ministrligi ABŞ-dan getirilýän ähli harytlara goşmaça 34% gümrük paçlarynyň giriziljekdigini mälim etdi. Täze düzgünler 10-njy aprelden başlap güýje girer.

Hytaý Halk Respublikasynyň Döwlet Geňeşiniň salgyt boýunça komissiýasy bu kararyň ABŞ-nyň prezidenti Donald Trampyň yglan eden gümrük paçlaryna garşy jogap çäreleri hökmünde kabul edilendigini nygtady. Komissiýa amerikaly hyzmatdaşlarynyň hereketleriniň «halkara söwda düzgünlerine laýyk gelmeýändigini, Hytaýyň hukuklaryna we bähbitlerine uly zyýan ýetirýändigini» aýtdy.

«Hytaý ABŞ-ny birtaraplaýyn salgytlary derrew ýatyrmaga we söwda jedellerini deňhukukly, hormat goýmak hem-de özara peýdaly maslahatlar arkaly çözmäge çagyrýar» — diýip, beýanatda bellenilýär.

Şeýle hem Hytaý ABŞ-nyň girizen salgytlary bilen baglylykda, Bütindünýä söwda guramasyna (BSG) resmi şikaýat bilen ýüz tutdy.
Ýatlatsak, 2-nji aprelde Waşington 5-nji aprelden başlap, 185 ýurtdan we sebitden getirilýän harytlara 10%-den 50%-e çenli gümrük paçlarynyň giriziljekdigini yglan edipdi. Tramp bu kararyň ABŞ-nyň ykdysadyýetini dikeltmek üçin zerurdygyny öňe sürüpdi.
Hytaýdan getirilýän harytlar üçin kesgitlenen gümrük paçlarynyň möçberi 34% boldy. Emma mundan öň girizilen çäklendirmeler bilen bilelikde bu görkeziji 54%-e ýetýär. Iň ýokary salgyt – 50% – Lesoto döwletine we Fransiýanyň deňizýaka sebitleri bolan Sen-Pýere hem-de Mikelona girizildi. Şeýle hem Ak tam hiç hili ilaty bolmadyk Herd we Makdonald adalaryna-da salgyt girizdi. Bu adalar Hindi ummanynyň subarktik zolagynda ýerleşýär. Ol ýerlerde hemişelik ýaşaýjylar ýok, ýöne köp sanly düwlen, pingwin we beýleki guş koloniýalary bar. Şol bir wagtyň özünde, bu adalar Awstraliýanyň daşarky sebitleri bolup, olaryň kenarlarynda eksport üçin balyklaryň käbir gymmatly we seýrek görnüşleri tutulýar.
«Bloomberg» neşiriniň maglumatlaryna görä, Trampyň beýanatyndan soň, dünýäniň iň baý 500 adamynyň umumy baýlygy 208 milliard dollar azaldy. Hususan-da Hytaýyň Huali Industrial Group Co. aýakgap öndürijisiniň esaslandyryjysy Çžan Sunýuan 1,2 milliard dollar ýitirdi.


03.10.2025 11:16
3.4k+

30-31-nji oktýabrda Frankfurtda Türkmenistanyň Ykdysadyýetiniň günleri geçiriler

30-31-nji oktýabrda Maýn boýundaky Frankfurt şäherinde Türkmenistanyň Ykdysadyýetiniň günleri işewürlik çäresi geçiriler. Onuň esasy maksady Türkmenistan bilen Ýewropa Bileleşiginiň ýurtlarynyň hem-de dünýäniň beýleki döwletleriniň arasyndaky hyzmatdaşlygy ösdürmek we söwda-ykdysady gatnaşyklaryny çuňlaşdyrmak bolup durýar...

02.10.2025 17:55
5.3k+

ABŞ-da hökümet işini bölekleýin togtatdy: täze maliýe ýyly üçin býujeti ylalaşyp bolmady

ABŞ-nyň Kongresi 1-nji oktýabrda başlan täze maliýe ýyly üçin býujeti ylalaşyp bilmedi. Hökümet işini bölekleýin togtatdy diýip, NBC News habar berýär. Kongresiň iki palatasyna-da respublikanlar gözegçilik edýär...

01.10.2025 13:21
1k+

Aşgabatda hökümetara türkmen-wenger toparynyň mejlisi geçirildi

29–30-njy sentýabrda Aşgabatda Ykdysady hyzmatdaşlyk boýunça hökümetara türkmen-wenger toparynyň altynjy mejlisi geçirildi. Wengriýanyň wekiliýetine Daşary işler we söwda ministrliginiň ikitaraplaýyn gatnaşyklary ösdürmek boýunça döwlet sekretary Boglarka Illeş ýolbaşçylyk etdi...

01.10.2025 12:33
4.3k+

Türkmenistanyň Prezidenti Hytaýyň ýolbaşçylaryny Hytaý Halk Respublikasynyň jar edilen güni bilen gutlady

Prezident Serdar Berdimuhamedow Hytaý Halk Respublikasynyň Başlygy Si Szinpine, Döwlet Geňeşiniň Premýeri Li Sýana, şeýle hem ýurduň dostlukly halkyna Hytaý Halk Respublikasynyň jar edilen güni mynasybetli tüýs ýürekden gutlaglaryny, iň gowy arzuwlaryny iberdi...