ABŞ-nyň Prezidenti Donald Tramp ýurda import edilýän harytlara gümrük paçlaryny girizendigini habar berdi. Onuň Ak tamdaky çykyşyny «Associated Press» agentligi göni ýaýlymda berdi.
Trampyň aýtmagyna görä, ABŞ «onýyllyklar» bäri söwda päsgelçiliklerini aýyrmaga synanyşyp gelýärdi, emma beýleki ýurtlar amerikan önümlerine «örän uly paçlary» saldy.
Çykyşynyň dowamynda ol girizilen paçlaryň mukdaryny görkezýän tablisany hem görkezdi. Sanawda dünýäniň 185 ýurdy bar. Hususan-da, Waşington Ýewropa Bileleşiginden getirilýän harytlara 20% paç girizýär, Hytaý üçin bu görkeziji 34%, Beýik Britaniýa üçin bolsa 10% bolar. Iň ýokary paçlar Kamboja (49%), Wýetnam (46%) we Şri-Lanka (44%) üçin girizildi.
Trampyň düşündirişine görä, Waşington ABŞ-a «adalatsyz» ýagdaýda salynýan paçlaryň, takmynan, ýarysyna görä çäre gördi. Mysal üçin, Hytaý ABŞ-nyň harytlaryna 67% paç salýar, şonuň üçin ABŞ hem 34% paç girizýär.
Şeýle-de ABŞ öndürijilik we milli howpsuzlyk üçin möhüm bolan import harytlaryna paç girizilmejekdigini mälim etdi.
Ak tamyň ýolbaşçysy 3-nji aprelden başlap, daşary ýurtdan getirilýän awtoulaglara 25% paç giriziljekdigini hem habar berdi. Ol bu çäreleri mart aýynyň ahyrynda yglan edipdi.
