Režissýor Sem Mendes “The Beatles” topary barada dört filmiň ählisiniň 2028-nji ýylda çykjakdygyny aýtdy. Bu barada ol CinemaCon-da Sony-nyň tanyşdyrylyşynda habar berdi.
Mendes tetralogiýanyň çykmagynyň kinoda yzygider birnäçe bölüme tomaşa edeniň ýalydygyny belledi we roluň dört sany kino ýyldyzynyň arasynda paýlanandygyny tassyklady: Pol Makkartniniň roluny Pol Meskal, Jon Lennony – Harris Dikinson, Jorj Harrisony – Jozef Kuinn, Ringo Starry – Barri Keogan ýerine ýetirer.
Režissýor filmleriň çykjak tertibini aýtmady, ýöne ähli bölümleri surata düşürmek üçin bir ýyldan köp wagtyň gerekdigini belledi.
Mendes The Beatles-i “ähtimal, ähli döwürleriň iň ähmiýetli topary” diýip atlandyrdy we olaryň “medeniýeti üýtgedendigini we biziň bilen baky galjakdygyny” belledi.
Režissýor toparyň taryhyny ekranlaşdyrmak üçin laýyk formaty köp wagtlap gözländigini aýtdy. Ol bir film görnüşini göz öňünde tutdy, ýöne ony ýeterlik däl diýip hasaplady. Serial hem, onuň pikiriçe, laýyk gelmedi.
“Täze nesil üçin bu epiki wakany gürrüň bermegiň usuly bolmaly. Men onda öwrenmeli zatlaryň bardygyna ynandyryp bilerin we biz muny etmegiň ýoluny tapdyk öýdýän” – diýip, Mendes aýtdy.
Onuň tetralogiýany düşürmek meýli barada 2024-nji ýylyň fewral aýynda belli boldy. Ilkibaşda premýeranyň 2027-nji ýylda bolmagyna garaşyldy, ýöne režissýor filmleriň üstünde 2028-nji ýylyň ortalaryna çenli işlejekdigini aýtdy.
