Soňky günlerde Günüň işjeňligi ýokarlandy. Alawlamalaryň sany artdy, bu bolsa eýýämden birnäçe geomagnit tupanynyň döremegine sebäp boldy. Geljekki hepdelerde tehniki enjamlaryň işleýşine we adamlaryň saglygyna täsir edip biljek geomagnit hadysalarynyň bolmagyna garaşylýar diýip, Russiýanyň Ylymlar akademiýasynyň Gün astronomiýasy laboratoriýasy habar berýär.
Alymlar ozal Günüň işjeňliginiň peselýändigini aýdypdylar. Geçen ýyl Günüň işjeňligi iň ýokary derejesine baryp ýetipdi. Şondan soň alawlamalaryň sany azalypdy. Alymlar Günüň asuda tapgyra geçýändigini çaklapdylar. Emma ýagdaýlar üýtgedi: Günde plazmanyň güýçli zyňylmagy bolup geçdi, bu hadysalar bolsa geomagnit tupanlarynyň döremegine sebäp boldy.
30-njy martda Günüň işjeňligi örän artdy. Şol gün enjamlar 15 sany alawlamany hasaba aldy, olaryň bäşisi radiasiýa tupanlaryna we radio päsgelçiliklere sebäp bolup bilýän orta M derejesine ýetipdi. 31-nji martda işjeňlik has-da artdy: 23 sany alawlama hasaba alyndy, alawlama görkezijisi 7,4 bala ýetip, bu bolsa bäş mümkin howp derejesinden üçünjisi bolan mämişi derejä laýyk geldi.
Çaklamalara görä, aprelde täze geomagnit tupanlarynyň bolmagyna garaşylýar. Geljekki günlerde magnit meýdanynda üýtgeşmeler bolar:
- ·5-nji aprel – G1 magnit hadysasy (5 bal);
- ·6–7-nji aprel – gowşak geomagnit üýtgeşmeler (4 bal);
- ·8–10-njy aprel – G1 magnit hadysasy (5 bal);
- ·11–14-nji aprel – gowşak geomagnit üýtgeşmeler (4 bal);
- ·21-nji aprel – gowşak geomagnit üýtgeşmeler (4 bal);
- ·22-nji aprel – G1 magnit hadysasy (5 bal);
- ·24-nji aprel – G1 magnit hadysasy (5 bal);
- ·25-nji aprel – gowşak geomagnit üýtgeşmeler (4 bal).
Şeýle hadysalar howa şertlerine duýgur adamlaryň saglygyna we hemra aragatnaşygynyň işleýşine täsir edip biler.
