Baş keşbi Tom Holland tarapyndan ýerine ýetirilýän «Möý adam 4» filmi «Möý adam: Täze gün» («Spider-Man: Brand New Day») ady bilen prokata çykar.
«Variety» neşiriniň habaryna görä, filmiň režissýory Destin Kretton bolar. Filmiň düşüriliş işlerine tomus başlanylar.
«Bilýän, biz „Öýe ýol ýok“ filminiň ahyrynda sizi ullakan gyzyklanma bilen galdyrdyk. Şonuň üçin „Möý adam: Täze gün“ – täze başlangyç bolar. Edil özi. Meň aýdyp biljek bar zadym şu» — diýip, Holland aýtdy.
2021-nji ýylda çykan «Möý adam: Öýe ýol ýok» (Человек-паук: Нет пути домой) filminde Piter Parker, Doktor Strenjiň ýerine ýetiren nädogry jadysyndan soň, hemmeleriň aňyndan öz şahsyýetini pozupdy.
Täze filmiň mazmuny mälim edilmese-de, onuň premýerasynyň 2026-njy ýylyň 31-nji iýulynda boljakdygy habar berildi.
«Men bu ajaýyp keşbiň indiki tapgyryny öwrenmek üçin dünýäniň iň zehinli sungat ussatlary bilen işleşýärin. Biz her gün geýim, hereketler, täzeçe hadysa döretmek, emosional hekaýat we mundan ozal edilmedik täsin attraksion döretmek hakda içgin oýlanýarys» — diýip, režissýor aýtdy.
Zendaýa bilen Jeýkob Batalonyň (Em-Jeý we Ned keşplerini ýerine ýetirýänler) filme gaýdyp gelmegine garaşylýar. Şeýle-de belläp geçsek, «Gaty geň işler» (Очень странных дел) serialynyň ýyldyzy Sedi Sink hem filmiň aktýorlar düzümine goşuldy.
