SpaceX kompaniýasy Fram2 hususy missiýasynyň çäginde Crew Dragon kosmos gämisini uçurdy. Bu polýar orbitada amala aşyrylýan ilkinji adamly uçuşdyr diýip, «CNN» habar berýär.
Gäminiň Ýeriň ekwatoryna 90 gradus ýapgytlykdaky burçdan kosmosa çykmagyna garaşylýar. Häzirki wagta çenli Ýeriň polýuslaryna iň ýakyn geçen kosmos gämisi 1963-nji ýylda uçurylan sowet «Wostok-6» bolup, ol 65 gradus ýapgytlykdaky burçdan kosmosa çykypdy.
Dolulygyna raýatlardan ybarat ekipaž kosmosda 3-5 gün bolar. Olar demirgazyk şöhlelerini synlarlar. Missiýanyň agzalarynyň biri, kinorežissýor Ýannike Mikkelsen, bu täsin tebigy hadysany ýörite enjamlar arkaly surata düşürmegi meýilleşdirýär.
Şeýle hem ekipaž kosmosda birnäçe ylmy synaglary geçirer. Barlaglaryň maksady kosmos uýgunlaşma sindromyny (astronawtlaryň 60%-den gowragyna täsir edýän baş aýlanma we kelleagyry), orbitada rahat uky bilen bagly meseleleri hem-de zenan gormonlarynyň derejesini öwrenmekdir. «CNN-iň» bellemegine görä, kosmosa çykan 700-den gowrak adamyň bary-ýogy 15%-i zenan, bu bolsa dartyş güýjüniň ýok şertlerinde olaryň beden aýratynlyklary baradaky ylmy maglumatlaryň azlygyna sebäp bolýar.
Fram2 missiýasynyň ýene bir möhüm ylmy synagy orbitada wýoşenka kömeleklerini ösdürip ýetişdirmekdir. Ekipaž bu kömelekleriň Aý we Mars missiýalary üçin durnukly iýmit çeşmesi bolup biljekdigini ýa-da bolup biljek däldigini barlarlar.
Gaýdyp gelenlerinde, ekipaž Kaliforniýanyň kenarlaryna gonar.
