Demirgazyk-Gündogar Federal uniwersitetinde (NEFU) mamont çagasynyň läşini öwrenmäge bagyşlanan halkara ylmy seminar başlandy. Alymlar oňa Ýana diýip at goýdular diýip, RBC habar berýär.
Taryhdan öňki haýwanyň läşi 2024-nji ýylyň iýun aýynda Werhoýanskiý etrabynyň Batagaýka sebitinden tapyldy. Tapyndynyň geologiki ýaşy 50 müň ýyldan geçýär diýip, uniwersitetiň metbugat gullugy habar berýär.
Mamont çagasy barada ilkinji gezek dekabr aýynda jemgyýetçilige mälim edildi. Barlaglar onuň oňat ýagdaýda saklanandygyny tassyklady.
“Kellesinden ýiten ýeri ýok, tumşugynda, gulaklarynda we agyz boşlugynda göze görnüp duran şikes ýok” – diýip, SWFU-nyň Telegram kanalynda habar berildi. Bu tapyndy dünýäde şeýle gowy ýagdaýda saklanyp galan ýedinji nusga boldy.
Tapyndy SWFU-nyň "Batagaýka" ylmy merkeziniň golaýyndaky Ýana derýasynyň basseýninde ýerli ýaşaýjylar tarapyndan ýüze çykaryldy. Olaryň sözlerine görä, läş hemişelik doň gatlakdan ýarym çözen ýagdaýda çykypdyr.
27–28-nji martda alymlar anatomo-morfologiki, molekulýar-genetiki, mikrobiologiki we beýleki barlaglary geçirdiler. Hünärmenler çaga mamontyň ýaşan ýeriniň tebigy we howa şertlerini täzeden döretmegi meýilleşdirýärler.
Mamontyň ýogalan wagtyndaky takyk ýaşy belli däl, ýöne bir ýaş töwereginde bolandyr diýip çaklanylýar. SWFU-da geçmişde aşa gazaply howa şertleri sebäpli, haýwan çagalarynyň çalt kemala gelendigini, olaryň agyr gyşlara taýynlyk görmeli bolandygyny belläp geçdiler.
