Corning Incorporated kompaniýasy Gorilla Glass Ceramic atly açyk aýna-keramiki örtügini hödürledi. Ol mobil enjamlaryň ekranlarynyň berkligini artdyrmaga ýardam berer. Kompaniýanyň maglumatlaryna görä, ol alýumosilikat aýnalara garanyňda, ýere gaçmalara garşy has gowy goragy üpjün edýär.
Laboratoriýa synaglary Gorilla Glass Ceramic-iň 1 metr beýiklikden asfalta meňzeş ýeriň üstüne 10 gezek gaçmagyna çydap bilýändigini görkezdi. Alýumosilikat aýnalar bolsa, eýýäm ilkinji urgyda döwülýärdi.
Täze material Corning Gorilla Glass gorag örtükleriniň hataryna goşular. Kompaniýa ýakyn aýlarda Gorilla Glass Ceramic-iň Motorola enjamyna ornaşdyryljakdygyny mälim etdi.
«Gorilla Glass berk we çydamly aýna hökmünde abraý gazandy, täze aýna-keramiki material hem bu däbi dowam etdirýär» — diýip, Corning Gorilla Glass-yň wise-prezidenti Dewid Welaskes aýtdy. Ol täze materialyň kompaniýanyň innowasion we ýokary hilli gorag örtüklerini işläp düzmäge ygrarlydygyny görkezýändigini belledi.
