Marvel kinostudiýasy «Ar alyjylar: Kyýamat güni» (Мстители: Судный день) filminiň aktýorlar düzümini yglan etdi. Olaryň atlary kinostudiýanyň YouTube kanalyndaky göni ýaýlymynda mälim edildi. Taslamanyň artistleriniň atlary görkezilen wideolar hem kinofranşizanyň X sosial torundaky resmi hasabynda ýerleşdirildi. Deadline neşiriniň habar bermegine görä, bu görkeziliş umumylykda 275 mln tomaşa aldy we 3,1 mln gezek sosial ulgamlarda agzalyp geçildi. Munuň özi Marvel üçin san görkezijileri babatda absolýut rekord.
Kinoälemden öňden tanyş atlaryň arasynda Kris Hemswort (Tor), Entoni Maki (Sem Uilson/Kapitan Amerika), Sebastýan Sten (Baki Barns), Pol Radd (Garynja adam), Tom Hiddlston (Loki) dagy bar. Aktýorlar düzümine Robert Dauni-kiçi (bu gezek antagonist Doktor Dumuň keşbinde), Çenning Tatum, Pedro Paskal, Jeýms Marsden, Ien MakKellen we Patrik Stýuart dagylar hem goşular.
Ar alyjylara ilkinji gezek Wanessa Kirbi (Sýu Ştorm), Letisiýa Raýt (Şuri), Uaýatt Rassel (ABŞ-nyň agenti), Ebon Moss-Bahrah (Jandar), Lýu Symu (Şang-Çi) we Florens Pýu (Gara dul Ýelena Belowa) dagylar goşular. Şeýle-de filmde Tenoç Uerta (Namor) we Lýuis Pullman (Sakçy) hem peýda bolar.
2024-nji ýylyň iýul aýynda San-Diegodaky (ABŞ) Comic-Con-da Dauni-kiçi Doktor Dumuň keşbinde sahnada görnüpdi. «Täze maska, şol bir maksat» — diýip, ol şol wagt tomaşaçylara aýdypdy.
Filmiň režissýorlary hökmünde «Gyş esgeri» (Зимний солдат) we «Ilkinji ar alyjy: Garşy duruş» (Первый мститель: Противостояние) filmlerinde işlän doganlar Jo we Entoni Russo çykyş eder.
Marvel mundan başga-da iki sany filmi taýýarlaýar: «Gök gürledijiler» (Громовержцы) 2025-nji ýylyň 2-nji maýynda çykar, «Fantastiki dörtlük: Ilkinji ädimler» (Фантастической четверки: Первые шаги) bolsa 2025-nji ýylyň 25-nji iýulynda görkeziler.
«Ar alyjylar: Kyýamat güni» filminiň premýerasy 2026-njy ýylyň 1-nji maýyna meýilleşdirilýär.
