Phohan ylymlar we tehnologiýalar uniwersitetiniň (POSTECH) günorta koreýaly inženerleri şekilini üýtgedip we ses çykaryp bilýän täze OLED displeýini hödürledi. Ol barada Flexible Electronics žurnalynda gürrüň berildi diýip, TechXplore habar berýär.
Inženerler elektrik togunyň täsiri bilen displeýiň şekilini üýtgedýän ultra-inçe polimer herekete geçirijisini döretdi. Ol çukanak, güberçek ýaly ýönekeý şekiller bilen bir hatarda S şekiline ýa-da tolkun görnüşli şekile-de eýe bolup bilýär.
Şarnirleri we motorly mehanizmleri ulanýan bar bolan çeýe displeýlerden tapawutlylykda, täze ekran diňe elektrik signallarynyň hasabyna şekilini üýtgedýär. Bu hem ony inçe, ýeňil we çeýe edýär.
Şeýle-de, displeý ses çykaryp bilýär: polimer herekete getirijisi ýokary ýygylykly signallaryň täsiri astynda wibrasiýa berip, ekrany dinamige öwürýär. Şeýlelik bilen, şeýle displeýli smartfonlar adaty dinamikden ýüz öwrüp biler.
“Biz OLED displeýlerini gymmatly edýän zatlaryň ählisini – olaryň çeýeligini, inçeligini we ýeňilligini sakladyk, ýöne olara şekilini üýtgetmek we ses çykarmak mümkinçiligini goşduk. Bu adaptiw we janly ekranlara tarap ilkinji ädim” – diýip, professor Su Sok Çhoý belledi.
