ABŞ-nyň Ýol hereketiniň howpsuzlygy boýunça milli edarasy (NHTSA) «Ford F-150» kysymly 1,3 million sany pikaby öz içine alýan derňew işine başlady. Muňa 2015-2017-nji ýyllarda öndürilen modelleriň eýeleriniň 138-siniň awtomatiki karobkanyň näsaz işleýändigi baradaky arz-şikaýatlary sebäp boldy.
«Reuters» agentliginiň habaryna görä, ulag ýolda barýan wagty, karobkasy öz-özünden birinji peredaça geçip biler. Bu ýagdaý ulagyň tizligini birdenkä pese düşürýär, şeýle-de tekerleriň gulplanmagyna hem getirip bilýär. Şikaýatçy bolan sürüjilerden biri karobkanyň hiç hili sebäpsiz altynjy peredaçadan birinjä geçendigini we «özüni aýnadan zyňylaýjak ýaly duýandygyny» aýdypdyr.
Ford bu näsazlygyň sebäplerini anyklamak üçin NHTSA bilen hyzmatdaşlyk edýändigini mälim etdi. Barlaglaryň netijesine görä, ulaglary yzyna çagyrmak boýunça karar kabul edilip-edilmeli däldigi kesgitleniler.
Geçen ýyl kompaniýa şuňa meňzeş mesele sebäpli, 2014-nji ýylda öndürilen 668 müň sany «F-150» pikabyny yzyna çagyrypdy. Indi bolsa, şol mesele täze modellerde hem ýüze çykyp dur.
