C-NCAP synaglarynda Xiaomi-niň ilkinji elektrikli awtoulagy bolan «SU7 Max-iň» howpsuzlyk derejesine iň ýokary baha berildi. Bu model 2024-nji ýylyň usulyýeti boýunça Hytaýda synagdan geçirilen ähli ýeňil awtoulaglaryň arasynda iň gowusy boldy diýip, «CarNewsChina» neşiri habar berýär.
Synagy geçirmek üçin tötänleýin saýlanan dilerden birnäçe «SU7 Max» satyn alyndy. Sedanyň bu görnüşi Hytaýda 41 müň 345 dollardan hödürlenýär. Ol «Pilot Max» ulgamy bilen enjamlaşdyrylýar.
Synaglaryň netijeleri awtoulagyň ýokary howpsuzlygyny tassyklady: tormoz ulgamy we awtomatiki funksiýalary täsirli işledi. Pyýadalar we welosiped sürýänler üçin gorag derejesi 90,42%, ýolagçy we sürüji üçin bolsa 94,31% boldy. Aktiw howpsuzlyk ulgamlary boýunça awtoulag 95,25% bilen iň ýokary bahany aldy.
Umumy bahasy 93,5% bolan «SU7 Max» bäş ýyldyz bilen sylaglandy we Hytaýda 2024-nji ýylyň C-NCAP usulyýetine görä synagdan geçirilen iň ygtybarly awtoulag hökmünde görkezildi. Awtoulag öndürmekde öň hiç hili tejribesi bolmadyk kompaniýa üçin bu örän uly üstünlik bolup durýar.
